బైబిలులోని ""హూషై""గారి క్లుప్త చరిత్ర

*బైబిలులోని ""హూషై""గారి క్లుప్త చరిత్ర...*

"హూషై" గారి కోసం నేటి క్రైస్తవ యువత ఖచ్చితముగా తెలుసుకోవాలి.

*హూషై గారు దావీదు గారికి నమ్మకమైన ప్రాణ స్నేహితుడు.*

దావీదు గారి కోసం ప్రాణము ఇవ్వడానికైనా సిద్ధపడే స్నేహితుడు.

*రాజైన దావీదు గారిని తన కొడుకైన అబ్షాలోము గారు మోసం చేసి, మోసపూరితముగా ఇశ్రాయేలీయుల ప్రజలను తనవైపు త్రిప్పుకుని హెబ్రోనులో తనకు తాను రాజుగా ప్రకటించుకుంటాడు.*

ఈ వార్త విన్న దావీదు గారు తన సహచరులతో నా కుమారుడైన అబ్షాలోము చేతిలో నుండి మనము తప్పించుకుని రక్షణ పొందలేము.

*కాబట్టి అబ్షాలోము చేతిలో మనము చావకుండా ఉండాలి అంటే పారిపోవాలి అని చెప్పి తన అనుచరులను తీసుకుని*

*అరణ్యానికి పారిపోతారు.*

(2సమూ 15 వ అధ్యాయం)

ఈ విషయం తెలుసుకున్న అబ్షాలోము గారు ఎలాగైనా సరే తన తండ్రిని వెదకి చంపి అధికారంగా రాజు అవ్వాలని అనుకుంటాడు.

*రాజైన దావీదు గారు అరణ్యంలో పాద రక్షలు లేకుండా ఒలీవ కొండ ఎక్కుతూ వుంటారు.*

ఇంతలో ఒకరు వచ్చి రాజా! నీ మంత్రి అయిన అహీతోపెలు గారు కూడా నీ కుమారుడైన అబ్షాలోము కుట్రలో చేరిపోయాడు అని చెప్తారు.

*ఆ వార్త విన్న దావీదు గారు అహీతోపెలు చేసే ఆలోచనలను చెడగొట్టమని ప్రార్ధించి ఒలీవ కొండమీదకు ఎక్కుతాడు.*

అక్కడ దేవుణ్ణి ఆరాధించే ఒక స్థలము ఉంది. 

*ఇంతలో ఒకరు పై వస్త్రాలు చింపుకుని తలమీద ధూళి పోసుకొని దావీదు గారి దగ్గరకు వస్తాడు ఆయనే "హూషై"" గారు.*

*తన స్నేహితుడైన దావీదు గారి పరిస్థితి చూసి చాలా దుఃఖించి, నేను కూడా నీతో వస్తాను అని అడుగుతారు.*

అందుకు దావీదు గారు తన స్నేహితుడైన హూషై గారితో వద్దు నువ్వు నాతో రావద్దు.

*నువ్వు పట్టణానికి తిరిగి వెళ్లి నా కుమారుడైన అబ్షాలోము తో రాజా! ఇంతవరకు నీ తండ్రికి సేవ చేసినట్లు ఇకను నీకు సేవ చేసెదను అని చెప్పి అబ్షాలోము చెంత చేరు.*

*అక్కడ నా పక్షముగా నువ్వు "గూఢచారిగా" ఉండి ప్రతీ విషయాన్ని నాకు తెలుపుతూ ఉండు.*

నువ్వు అక్కడ ఉంటే అహీతోపెలు యొక్క ఆలోచనను చెడగొట్టగలవు అని చెప్తారు.

*తన స్నేహితుడు అడిగిన సహాయం కోసం ఏమి ఆలోచించకుండా సరే నేను గూఢచారిగా వెళ్తాను అని దావీదు గారికి మాట ఇస్తాడు హూషై గారు.*

(2సమూ 15:32-37)

*అబ్షాలోము గారి దగ్గరకు గూఢచారిగా వెళ్లడం అంటే మాములు విషయం కాదు.*

*తన తండ్రినే చంపాలి అని చూస్తున్న అబ్షాలోము గారికి హూషై గారు దావీదు గారి గూఢచారి అని తెలిస్తే ఎంత భయంకరంగా చంపేస్తాడో హూషై గారికి తెలుసు.*

పైగా అబ్షాలోము గారితో ఉన్న సైన్యం, అహీతోపెలు గారు కూడా ఎంత భయంకరమైన వారో కూడా తెలుసు అన్ని తెలిసికూడా తన స్నేహితుని కోసం ప్రాణాన్ని పణంగా పెట్టి గూఢచారి గా వెళ్లి అబ్షాలోము గారి చెంత చేరతాడు. *నిజంగా హూషై గారి ధైర్యం, స్నేహితునిపై ఉన్న ప్రేమ చాలా అద్భుతమైనది.*

(2సమూ 16:15-19)

*దావీదు గారు అనుకున్నట్టే అహీతోపెలు గారు దావీదు గారిని ఎలా చంపాలో అని అబ్షాలోము గారికి ఒక ఆలోచనను ఇస్తాడు.*

ఈ ఆలోచన అబ్షాలోము గారికి చాలా బాగా నచ్చుతుంది.

*కానీ దావీదు గారు అహీతోపెలు చేసే ఆలోచనను చెడగొట్టుము అని ముందుగానే దేవునికి ప్రార్ధించాడు కాబట్టి దేవుడు అహీతోపెలు గారి ఆలోచనను చెడగోటేస్తారు.*

ఎలాగంటే!!

*అహీతోపెలు గారి ఆలోచనను విన్న అబ్షాలోము గారు హూషై గారిని పిలిచి అహీతోపెలు గారు చెప్పిన ఆలోచనను మొత్తం హూషై గారికి చెపుతాడు.*

అది విన్న హూషై గారు ఈ ఆలోచన ఎలాగైనా చెడగొట్టి నా స్నేహితుని ప్రాణం కాపాడాలి అని అనుకుని

రాజా! అహీతోపెలు గారు చెప్పిన ఈ ఆలోచన అంత సరైనది కాదు అని చెప్పి

హూషై గారే ఒక మంచి ఆలోచనను చెప్తారు.

*ఈ ఆలోచన అబ్షాలోము గారికి, అక్కడ ఉన్న ప్రతీ ఒక్కరికీ బాగా నచ్చుతుంది.*

వెంటనే అబ్షాలోము గారు అహీతోపెలు గారి ఆలోచనను పక్కన పెట్టి హూషై గారి ఆలోచన ప్రకారం చేయటానికి సైనికులకు ఆజ్ఞ ఇస్తాడు.

(2సమూ 17:1-15)

*ఈ హూషై గారు వెంటనే ఈ వార్తను అక్కడున్న యాజకులైన సాదోకు, అబ్యాతారు గార్లకు చెప్పి ఈ విషయం వెంటనే దావీదు గారికి తెలియచేయండి అని చెప్తాడు.*

యాజకులైన సాదోకు, అబ్యాతారు గార్లు తమ కుమారులైన యోనాతాను, అహిమయస్సు అనువారిని దావీదు గారి దగ్గరకు పంపుతారు.

*ఈ ఇద్దరూ దావీదు గారికి వర్తమానము తీసుకెళ్తున్నారని అబ్షాలోము గారి యొక్క పనివాడు తెలుసుకుని అబ్షాలోము గారితో చెప్తాడు.* వెంటనే అబ్షాలోము గారు తన సైనికులతో వారినిద్దరిని చంపేయండి అని ఆజ్ఞ ఇస్తారు.

*కానీ దేవుని కృప వలన ఆ ఇద్దరూ దావీదు గారి దగ్గరకు క్షేమముగా చేరుకుని వర్తమానము తెలియచేస్తారు.*

అది విన్న దావీదు గారు అక్కడ నుంచి తన జనులను తీసుకుని యొర్దాను నది దాటి వెళ్ళిపోతారు.

(2సమూ 17:15-22)

*వార్త పట్టుకెళ్తున్నారని తెలిసి యోనాతాను, అహిమయస్సు గార్లను చంపేయండి అని ఆజ్ఞ ఇచ్చిన అబ్షాలోము గారికి*

*అసలు ఆ ఆలోచన ఇచ్చింది హూషై గారే అని తెలిస్తే హూషై గారిని ఎంత భయంకరంగా చంపేస్తాడో ఒక్కసారి ఆలోచించండి.*

తన స్నేహితుని కోసం భయంకరమైన చోటుకు వెళ్లి గూఢచారిగా పని చేసి తన స్నేహితుడైన దావీదు గారి ప్రాణాలను కాపాడాడు ఈ హూషై గారు.

*హూషై గారు తన స్నేహితుని కోసం చేసిన సాహసం నిజంగా చాలా ఆశ్చర్యమైనది, భయంకరమైనది...*

దావీదు గారు హూషై గారిని భయంకరమైన మనుస్యుల మధ్యకు పంపించాడు. హూషై గారు వెళ్లారు, వెళ్లిన పని ముగించారు.

అలాగే...

*శిష్యులైన వారిని కూడా ప్రభువు తోడేళ్ల మధ్యకు పంపించారు.*

వారు మేము వెళ్ళము అని అనలేదు.

*సర్వ సృష్టికి వెళ్లారు దేవుడు అప్పగించిన పని చేసారు. చివరికి దేవుని కోసం హతసాక్ష్యులు అయిపోయారు.*

(లూకా 10:3)

*ఓ క్రైస్తవ యువతి యువకా!!*

*మరి నువ్వు నేను తోడేళ్ల మధ్యకు వెళ్తున్నామా??*

ఈరోజుల్లో అపవాది మనుస్యులను క్రూరంగా తయారు చేస్తుంది.

*ఎక్కడ చూసినా దారుణాలు, అత్యాచారాలు, దొంగతనాలు, మోసాలు, హత్యలు..*

*మనిషిలో మానవత్వం, ప్రేమ, దయ, కనికరం కనుమరుగు అయిపోతున్నాయి.*

*నశించిపోతున్న మనుష్యులు రక్షింపబడాలి అంటే వారందరూ క్రీస్తు రక్తములో కడగబడి ఆయన ప్రేమను అందుకోవాలి, రుచి చూడాలి..*

అలా జరగాలి అంటే హూషై గారివలె, ప్రభువు యొక్క శిష్యుల వలె మనము కూడా భయంకరమైన సమాజంలోకి ధైర్యంగా వెళ్లి క్రీస్తు సువార్తను చాటాలి..

*క్రీస్తు ప్రేమను బోధతో, బ్రతుకుతో చూపించాలి..*

*ఎందరో మిషనేరీలు క్రీస్తు కొరకు ప్రాణాలను కోల్పోయారు, ఆస్తులను, కుటుంబాలను కోల్పోయారు. సుఖాలను, సంతోషాలను త్యాగం చేశారు.*

మనము మాత్రం ఇంకా బాధ్యత లేని క్రైస్తవులముగానే కాలాన్ని వృధా చేస్తున్నాము....

*మనం*

*అపవాదిని ఎదిరించాలి.*

వాడి ఆలోచనలను నాశనం చేయాలి.

*వాడిని వాడి సైన్యాన్ని చితకత్రోక్కాలి...*

(ఎఫెసి 6:10-18, రోమా 16:20, 1యోహాను 3:8)

*అప్పుడు క్రీస్తు రాజ్యము వ్యాప్తి చెందుతుంది..*

*హూషై గారు తన స్నేహితుని కోసం చేసినట్టు మనము కూడా మన ప్రాణ స్నేహితుడైన యేసుప్రభువు గారికోసం చేద్దాము.*

*ఆయన సర్వ సృష్టికి వెళ్లి సువార్త ప్రకటించమని చెప్పారు*

(మార్కు 16:16)

*ఆయన చెప్పినట్టు చేస్తే మనము కూడా యేసుప్రభువు గారికి స్నేహితులము అవుతాము*

(యోహాను 15:14)

ప్లీజ్ ఫ్రెండ్స్ దేవునికి స్నేహితులము అయ్యే గొప్ప అవకాశాన్ని పోగొట్టుకోవద్దు.

*దేవుని రాకడ అతి దగ్గరలో ఉంది కాబట్టి త్వరగా మనము సువార్తను వెదజల్లుదాము, ఆత్మలను రక్షించి క్రీస్తువారికి బహుమతిగా ఇద్దాము.*

*హూషై గారి ద్వారా మన దేవాది దేవునికే మహిమ కలుగును గాక!!!!*

*మరనాత= ప్రభువు వచ్చుచ్చున్నాడు.*

1కోరింది 16:22.

*ఇదిగో నేను త్వరగా వచ్చుచున్నాను.*

ప్రకటన 22:7

*ప్రభువైన యేసూ రమ్ము..*

ప్రకటన 22:20.