క్రిస్మస్

⚡️✨💫 క్రిస్మస్ 💫✨⚡️

        (పదకొండవ భాగము) 

క్రిస్మస్ లో ప్రధానమైన అంశాలలో "విధేయత" ఒకటి. ఇద్దరు యవ్వనుల యొక్క విధేయతే క్రీస్తు శరీరధారిగా లోకానికి రావడానికి కారణమయ్యింది.

💮 1. మరియ:

ఆమె కన్యక. లూకా 1:27 

లోక మాలిన్యము తనకు అంటకుండా జీవించిన పరిశుద్దురాలు. దానిలో ఎట్టిసందేహం లేదు. ఆమెను పరిశుద్దమైన స్త్రీగా మనము గౌరవించాలి. తన జీవితాన్ని మన జీవితాలకు ఆదర్శప్రాయంగా మలచుకోవాలి. కాని, ఆరాధించడానికి వీల్లేదు. కారణం? మనుష్యలు గాని, దేవదూతలు గాని ఆరాధనకు యోగ్యులుకారు. దేవుడొక్కడే ఆరాధనకు పాత్రుడు. జ్ఞాలులు కుడా యేసును మాత్రమే ఆరాధించారుగాని, మరియను గాని, యోసేపును గాని కాదు. 

♻️ఎట్లాంటి పరిస్థితులలో ఆమె యేసు ప్రభువుకు తల్లి అయ్యే ధన్యతను పొందుకోగలిగింది? 

మరియ హృదయంలో అద్భుతమైన సంఘర్షణ. ఒక వైపు రక్షకునికే తల్లి అయ్యే ధన్యత. మరొక పైపు వివాహం కాకుండా తల్లి అయితే? లోకంలోఎట్లా జీవించగలగడం? రాళ్లతో కొట్టి చంపేస్తారు. చివరకి ఒక నిర్ణయానికి వచ్చేసింది. నిందలు, అవమానం భరించడానికే సిద్దపడింది. దేవుడు పంపిన, దూత చెప్పిన వర్తమానముకే విధేయురాలయ్యింది.

🔸తాను అనుకున్నట్లే జరిగింది. 

🔸లోకం సూటిపోటి మాటలతో ఆమెను హేళన చెయ్యడం ప్రారంభించింది. 

🔸మరియ పరిశుద్దత ఏంటో ఇప్పుడు బయటపడిందని, లోకం కోడై కూస్తుంది. 

🔸చివరకి కొంతకాలం ఇంట్లోనుండి వెళ్ళిపోవలసి వచ్చింది. 

🔸అన్నిటిని భరించింది. 

కాబట్టే! లోక రక్షకునికి తల్లి అయ్యింది. 

💮 2. యోసేపు:

అతడు నీతిమంతుడు. మత్తయి 1:19

పరిశుద్ధ గ్రంధములో వ్రాయబడిన నీతిమంతులలో యోసేపు ఒకడు. 

నీతి అంటే? ఆయనను నమ్మడమే నీతి. 

నీతిమంతుడు అంటే? ఆయనను నమ్మినవాడు. నీతిమంతుని లక్షణం?

ఇతరులను అవమాన పరచకపోవడం. 

అందుకే నీతిమంతుడైన యోసేపు ఒక తీర్మానమునకు వస్తున్నాడు. మరియను అవమాన పరచకుండా రహస్యముగా విడచి పెట్టాలని. వివాహం కాక మునుపే తాను ప్రధానం చేసుకున్న మరియ గర్భం ధరించిందని ఊరంతా తెలిసింది. అది యోసేపుకు గొప్ప అవమానం. కాని, ఆ అవమానాన్ని తానే భరించడానికి నిర్ణయించుకున్నాడు గాని, ఇతరులను అవమాన పరచడానికి ఇష్టపడినవాడు కాదు. 

♻️యోసేపు విధేయుడు:

దూత వర్తమానం తెచ్చాడు. మరియ పరిశుద్దాత్మ వలన గర్భంధరించింది. ఆమెను చేర్చుకోవడానికి వెనుకాడవద్దని. దేవుని మాటకు విధేయుడయ్యాడు. ఆమెను చేర్చుకున్నాడు. గర్భం ధరించిన స్త్రీని చేర్చుకుంటే లోకం ఊరుకుంటుందా? వాటన్నిటిని భరించాడు. అందుకే, ఈ లోకంలో లోకరక్షకునికి తండ్రిగా పిలవబడుచున్నాడు. 

👉దేవుని మాటకు గొర్రెల కాపరులు విధేయులయ్యారు. 

👉దేవుని మాటకు మరియ విధేయురాలయ్యింది.

👉దేవుని మాటకు యోసేపు విధేయుడయ్యాడు. 

మన సంగతేంటి? ఇంకనూ ఎదురాడు వారిగానే జీవిస్తున్నామా? అవిధేయులుగానే బ్రతుకుతున్నామా? ఇంకెంత కాలం?

👉ఆయనను ఇంకనూ, పశువుల తొట్టెలోనున్న శిశువుగానే చూస్తూ జోలపాటలు పాడే సమయమిది కాదు. 

👉ఆయన కృపా మయుడు, ప్రేమామయుడు అంటూ, జీవితాన్ని సరిచేసుకోకుండా వాయిదాలు వేసే సమయమిది కాదు. 

👉ఆయనను గొర్రెపిల్లలా చూస్తూ, గుర్రుపెట్టి నిద్రపోయే సమయమిది కాదు. 

ఆయన మాహోగ్రుడై, దహించు అగ్నిగా, న్యాయాధిపతిగా, గర్జించు కొదమ సింహమువలే రాబోతున్నాడు. ఇంకనూ, విధేయత చూపకుంటే. తప్పించుకోలేము. కృపా కాలం గతించిపోతుంది. ప్రభువు రాకడ సమీపమౌతుంది. ఇకనైనా, విధేయులవుదాం! శాశ్వత రాజ్యాన్ని స్వతంత్రించుకుందాం! అట్టి కృప, ధన్యత దేవుడు మనకు అనుగ్రహించునుగాక! ఆమెన్! ఆమెన్! ఆమెన్!