సామెతలు

▫️——— సామెతలు ———▫️

      క్లుప్త ధ్యానములు ( Part: 4)

నా కుమారుడా, పాపులు నిన్ను ప్రేరేపింపగా ఒప్పకుము. మాతోకూడ రమ్ము మనము ప్రాణముతీయుటకై పొంచియుందము నిర్దోషియైన యొకని పట్టుకొనుటకు దాగియుందము. పాతాళము మనుష్యులను మింగివేయునట్లు వారిని జీవముతోనే మింగివేయుదము సమాధిలోనికి దిగువారు మింగబడునట్లు వారు పూర్ణ  బలముతోనుండగా మనము వారిని మింగివేయుదము రమ్ము అని వారు చెప్పునప్పుడు ఒప్పకుము. పలువిధములైన మంచి సొత్తులు మనకు దొరుకును మన యిండ్లను దోపుడుసొమ్ముతో నింపుకొందము నీవు మాతో పాలివాడవై యుండుము మనకందరికిని సంచి ఒక్కటే యుండును అని వారు నీతో చెప్పుదురు. 

           సామెతలు 1:10-14

ప్రార్ధనాపరులైన తలిదండ్రులకు పుట్టిన పిల్లలెందరో, పోకీరీలవలె తిరగడం మనం చూస్తూనే వున్నాము. కారణం? స్నేహమే కావొచ్చు. కొన్నిసార్లు స్నేహము మితిలేని మేలు చెయ్యడానికి ప్రోత్సహిస్తే, మరికొన్నిసార్లు వారి జీవితాలను పతనం అంచులకు చేర్చొచ్చు. 

♻️ తలిదండ్రులుగా పిల్లలకు కొన్ని ముఖ్యమైన పాఠాలు నేర్పిస్తూ, సరిచేస్తూ ఉండాలి. 

👉స్కూల్స్ లో నుండి ఇతరుల పెన్సిల్స్ వంటికి తీసుకొస్తున్నప్పుడు 

👉ప్రక్కవారి పెరట్లే కాయలు కోసుకొస్తున్నప్పుడు 

👉పొరుగువారి పిల్లలను గిచ్చుతూ వున్నప్పుడు చూసీ, చూడనట్లుగా మిన్నకుండిపోకూడదు. 

👉నేటిదినాన్న తనతోడివారిని ఏడిపించడం వారికి వినోదంలా వుండొచ్చు. తర్వాత అది శాడిజానికి దారితీయొచ్చు. 

👉అట్లాంటివి సరిచెయ్యాల్సి వచ్చినప్పుడు, మన పిల్లలు బాధపడతారేమో అనుకుంటే, మన జీవితాంతం వారి గురించి బాధపడాల్సివస్తుంది. తలనొప్పితో పోయేది, గుండెపోటుకు చేరుకొనే ప్రమాదముంది. 

👉కొంతమంది పిల్లలు బూతులు తిడుతుంటే, తలిదండ్రులు పగలబడి నవ్వుతుంటారు. మరికొందరైతే పనిపెట్టుకొని మరీ బూతులు, తిట్లు  నేర్పిస్తుంటారు. ఇట్లాంటి తలిదండ్రులు వారి జీవితాంతం పశ్చాత్తాపపడక తప్పదు. 

👉నేటిబాలలే రేపటి పౌరులు అన్నట్లు, నేడు చిలిపి పనులు చేసే పిల్లలే, రేపటి త్రాగుబోతులు, జూదగాళ్లు, హంతకులు, రౌడీలు, దొంగలు, వ్యభిచారులు కావొచ్చు. 

👉నేటి దినాల్లో అనేకులు డ్రగ్స్ కి అడిక్ట్ అయ్యారు. డ్రగ్స్ దొరక్క, కాఫ్ సిరప్స్ కొని త్రాగేస్తున్నారు. ఇక సిగరెట్స్, బీర్లు వీటిగురించి చెప్పాల్సిన పనిలేదు. 

👉వారి బాల్యమునుండి స్కూల్స్ లోగాని, కాలేజస్ లోగాని, పొరుగువారితోగాని వారి స్నేహాలు ఎట్లా వుంటున్నాయో పరిశీలించి, ఆధ్యాత్మిక, నైతిక విలువలతోకూడిన బోధచేయ్యాలి. అవసరమైతే దండించాలి, సరిచేయాలి. 

ఇట్లాంటి భయభక్తులతో పెరిగిన బిడ్డలు, పాపులు పాపము చేయుటకు ప్రేరేపించినప్పటికీ వారు తప్పుకుంటారు తప్ప, ఒప్పుకొనరు. 

పాపులు ఎప్పుడూ, వారు చేస్తున్న దుర్మార్గపు, ఇతరులకు కీడుకలిగించే పనులు చెయ్యడానికి ఇతరులను లాగడానికి ప్రయత్నిస్తుంటారు. వారిమాటలు ఎంత బాగుంటాయో? 

ఏ పాపం తెలియని పిల్లాడిని కిడ్నాప్ చేసేద్దాం. ఇన్ని లక్షలు కావాలని డిమాండ్ చేద్దాం. పిల్లవాడిని విడిపించుకోవడం కోసం చచ్చినట్లు చెల్లిస్తారు. ఒక్కరాత్రిలో లెక్కలేనంత డబ్బు. మనమంతా సమానంగా పంచుకోవచ్చు. ఏమాత్రం కష్టపడకుండా లైఫ్ ని ఫుల్ గా ఎంజాయ్ చెయ్యొచ్చు. నీవేమి భయపడాల్సింది లేదు. మాకు ఫుల్ ఎక్స్పీరియన్స్ వుంది. పట్టుబడే ప్రశ్నే లేదు. నీవు చెయ్యాల్సింది ఏమీ లేదు. మాతో వుంటే చాలు. అంటూ వారి ఉచ్చులోనికి నిన్ను లాగే ప్రయత్నం చేస్తారు. ఒక ఇంటిని లేదా బ్యాంకు ను దోచేద్దాం! దోపుడు సొమ్ము పంచుకుందాం అంటూ అనేకమైన ఆఫర్స్ యిస్తారు. 

ధనవంతులగుటకు అపేక్షించు వారు శోధనలోను, ఉరిలోను, అవివేక యుక్తములును హానికరములునైన అనేక దురాశలలోను పడుదురు. అట్టివి మనుష్యులను నష్టములోను నాశనములోను ముంచివేయును. (1 తిమోతికి 6:9)

అట్లా అని, ఈ వాక్యం కేవలం యువకులకు  మాత్రమే పరిమితం కాదు. వీళ్ళకంటే యువతులు చేసేపనులు లెక్కలేనన్ని. తలిదండ్రుల దగ్గర నటించడంలో వారికి వారే సాటి. 

యువతీ యువకులారా, మిమ్ములను బట్టి, మీ కుటుంబ గౌరవం, మీ ఆధ్యాత్మిక జీవితం పతనం కాకూడదు. మీ స్నేహం చెడ్డదైతే వారి తలంపులలోనూ, వారి క్రియల్లోనూ, వారితోనూ చేరొద్దు. వారి ప్రలోభాలకు లొంగవద్దు. నీజీవితాన్ని యేసయ్యకు సమర్పించి ప్రత్యేకించబడిన జీవితాన్ని జీవించుటకు నీ హృదయాన్ని సిద్ధపరచుకో! అట్టి కృప ధన్యత ప్రభువు మనకు అనుగ్రహించును గాక! ఆమెన్! ఆమెన్! ఆమెన్!