సామెతలు

❇️—— సామెతలు ——❇️

     క్లుప్త ధ్యానములు ( Part: 9)

జ్ఞానము వారికి అసహ్యమాయెను యెహోవాయందు భయభక్తులు కలిగియుండుట వారి కిష్టము లేకపోయెను. నా ఆలోచన విననొల్లకపోయిరి నా గద్దింపును వారు కేవలము తృణీకరించిరి. కాబట్టి వారు తమ ప్రవర్తనకు తగిన ఫలము ననుభ వించెదరు తమకు వెక్కసమగువరకు తమ ఆలోచనలను అనుస రించెదరు. జ్ఞానములేనివారు దేవుని విసర్జించి నాశనమగుదురు. బుద్ధిహీనులు క్షేమము కలిగినదని మైమరచి నిర్మూలమగుదురు. నా ఉపదేశము నంగీకరించువాడు సురక్షితముగా నివసించును వాడు కీడు వచ్చునన్న భయము లేక నెమ్మదిగా నుండును.

        సామెతలు 1:29-33

ఒక విషయాన్ని ఇష్టపకపోవడం వేరు, దానిని అసహ్యించుకోవడం వేరు. కొన్ని సందర్భాలలో ఒక విషయాన్ని యిష్టపడకపోయినా, మరికొన్ని సందర్భాలలో యిష్టపడవచ్చు. కానీ, అసహ్యించుకోవడం అంటే? ఎప్పటికి యిష్టం కలుగదు. 

అజ్ఞానులు జ్ఞానమును అసహ్యించుకొంటారు. జ్ఞానము అంటేనే వారికి ఎప్పటికి యిష్టం కలుగదు. 

జ్ఞానం అంటే?

🔸దేవుని వాక్యం 

🔸దేవుని సలహా 

🔸దేవుని గద్దింపు

🔸 దేవుని ఉపదేశం 

జ్ఞానం ఎట్లా లభిస్తుంది? 

యెహోవాయందు భయభక్తులు నిలపడం ద్వారానే సాధ్యం. 

అయితే, అజ్ఞానులు ఈ పని చెయ్యరు. దేవుడంటే, వారికి లెక్కేలేదు. దేవుడు ఉన్నాడంటే, ఆయనకు భయపడాల్సివస్తుందని, దేవుడే లేడంటారు. అట్లాంటివారు బుద్ధిహీనులు ( మూర్ఖులు) వారికి, నచ్చినట్లుగా వారు జీవిస్తారు. 

♻️ వారు తమ ప్రవర్తనకు తగిన ఫలము ననుభవించెదరు:

అజ్ఞానులు, దేవునియందు భయభక్తులు నిలుపక, వారినచ్చినట్లు జీవించడం ద్వారా దాని ప్రతిఫలాన్ని తప్పక అనుభవించితీరుతారు. 

👉 మోస పోకుడి, దేవుడు వెక్కిరింపబడడు; మనుష్యుడు ఏమివిత్తునో ఆ పంటనే కోయును (గలతీ 6:7)

👉 భూలోకమా, వినుము; ఈ జనులు నా మాటలు వినకున్నారు, నా ధర్మశాస్త్రమును విసర్జించుచున్నారు గనుక తమ ఆలోచనలకు ఫలితమైన కీడు నేను వారిమీదికి రప్పించుచున్నాను. (యిర్మియా 6:19)

👉 మీ క్రియల ఫలములనుబట్టి మిమ్మును దండించె దను, నేను దాని అరణ్యములో అగ్ని రగుల బెట్టెదను, అది దాని చుట్టునున్న ప్రాంతములన్నిటిని కాల్చివేయును;  ఇదే యెహోవా వాక్కు.

( యిర్మియా 21:14)

👉 దయగలవారియెడల నీవు దయచూపించుదువు యథార్థవంతులయెడల యథార్థవంతుడవుగా నుందువు. సద్భావముగలవారియెడల నీవు సద్భావము చూపుదువు. మూర్ఖులయెడల నీవు వికటముగా నుందువు (కీర్తనలు 18:25,26)

♻️ జ్ఞానములేనివారు దేవుని విసర్జించి నాశనమగుదురు:

దేవునిని విసర్జించినవాడు క్రమమైన జీవిత విధానాన్ని కలిగియుండలేడు. ఈలోకంలో ఉన్నత స్థితిలోవున్నట్లు అనిపించినా వారు, కాలు జారే స్థలంలోనున్నట్లే. ఏ క్షణాన్న కాలుజారుతుందో, ఆ క్షణాన్న నాశనమవుతారు. బుద్ధిహీనులు క్షేమము కలిగినదని మైమరచి నిర్మూలమగుదురు. 

అయితే, జ్ఞానము యొక్క ఉపదేశమును విని, అనుసరించేవారు 

🔹సురక్షితముగా నివసిస్తారు 

🔹కీడును గూర్చిన భయము లేదు. 

🔹సమాధానంతో జీవిస్తారు. 

👉వాని హృదయము యెహోవాను ఆశ్రయించి స్థిర ముగా నుండును వాడు దుర్వార్తకు జడియడు. వాని మనస్సు స్థిరముగానుండును తన శత్రువుల విషయమైన తన కోరిక నెరవేరు వరకు  వాడు భయపడడు. ( కీర్తనలు 112: 7,8)

👉 గాఢాంధకారపు లోయలో నేను సంచరించినను ఏ అపాయమునకు భయపడను నీవు నాకు తోడై యుందువు నీ దుడ్డుకఱ్ఱయు నీదండమును నన్ను ఆదరించును. (కీర్తనలు 23:4)

అజ్ఞానులవలే కాక, జ్ఞానులవలే యెహోవాయందు భయభక్తులు కలిగి, సురక్షితముగా, భయములేకుండా, నెమ్మదికలిగి జీవిస్తూ, నిత్యమైన ఆశీర్వాదములను స్వతంత్రించుకొందము. అట్టి కృప, ధన్యత దేవుడు మనకు అనుగ్రహించును గాక!

ఆమెన్!  ఆమెన్!  ఆమెన్!